بيسو .. حكاية قط جميل

بـيـســـو .. حكاية قط جميل

بيسو .. بيسو .. Beso،، قط جميل صغير .. معرفش أتولد يوم أيه بالضبط ... معرفش أصله وفصله .. مرفش مين باباه أو مين مامته ... معرفش ليه أخوات ولا وحيد .. ولا حتى أعرف كان فين ومع مين ... كله اللي أعرفه .. أني مش هلاقي زيه في يوم من الأيام .. لأن بيـســو حكاية جميلة.

تبدأ حكاية ((بيـسو)) في يوم من الأيام كنت ماشي مع صاحبي بنستفسر عن حجات عايزها .. لاقتني واقف مرة واحدة أمام محل حيوانات أليفة .. وبنادي .. يا حج يا أستاذ ,, عندك قطط سيامي جميلة ؟؟ ... لاقيت شاب صغير مقرب مني وبيقولي أنت عايز أيه بالضبط وأنا أجيبهولك .. قلت له عايز قطة صغيرة سيامي .. بس تكون جميلة .. قالي خلاص .. سيبلي عربون وأجيبهالك من المزرعة ... مزرعة أيه أنا عايز قطة مش خروف أو معزة .. قالي أصلي بربيهم في مزرعة تبعد نحو ساعة بالعربية ,, قلت له يعني لو كده ممكن تجيبها لي النهاردة .. قالي ساعتين وعدي علي .. وأول ما أوصل وأجي المحل هتصل بيك .. قلت له خلاص اتفقنا .. بس خد بالك .. عايز قطة جميلة .. مأدبة .. محترمة .. متعلمة .. متربية .. ولا أقولك .. عايزها شقية .. مشمشية .. متعفرته .. عنيها حلوة .. وأيديها متلونة .. وديلها مهندم .. وشنها ناعم .. بص هاتلي قطة ينفع أربها .. مش هي اللي تربيني ... أتفقنا ... أتفقنا .. أنا هعدي عليك كمان ساعتين .. متتأخرش علي.

مش قادر أوصفلكم الساعتين دول عدوا علي أزاي .. سرحان في خيالي الحاضر .. أنا هيكون عندي قط أو قطة .. سيامي .. جميلة .. هأكلها .. هشربها .. هلاقيها بين أيدي في منامي .. وتحت رجلي في صحياني .. هرميلها كورة تلعب بها ويمكن تمرهالي تاني .. أنا ناوي ألبسها هدوم قطط .. واعملها بيت قطط .. وأحطلها لعب فيها كتير كتير كتير ... أنا ناوي لو ولد أسميه (قطقوط) ولو بنوتة حلوة هسميها (قطقوطة).

مفيش ساعة لاقيت الشاب متصل بي وبيقولي .. مبروك جالك قط ولد صغير .. قلت له نعم .. أنا لسة متجوزتش .. ولو اتجوزت ناوي اتجوز إنسانة زي زيها .. مش قطة .. أجري يا شاطر ألعب بعيد ... قالي انت بتهزر .. مش أنت اللي عايز قطة .. ساعتها صحيت من الحلم المقطط بتاعي .. قلت له أه أه معلش أصلي كنت سرحان في القط وحكايته ... أيه انت جبته خلاص .. معقولة الساعتين عدوا بالسرعة ديه .. قالي أه .. تعالى أنا منتظرك بالمحل.
روحت أجري ... وقرب المحل بعشر متر .. نسيت الفلوس ... رجعت جري بسرعة فين باقي المبلغ .. أنا كنت مجهزه هنا .. أه .. هو ده .. تمام ألحق ارجع بقى للمحل وأخد القط.

وفعلاً .. قط جميل .. ناعم الإحساس .. صغير السن .. واقف وكأنه عايز يجري علي .. وأنا في قرارة نفسي بجري عليه .. هو ده .. هو ده .. أنا مش هسميك قطقوط .. أنا هسميك ((بيـسـو)) .. شكلك يدي ((بيـســو)).

أخدته وجري .. هو ده بيسو .. هتاله بقى بيت شيك من دول .. وطوق حلو من دول .. وأكل كويس من الغالي .. وشانبه للقطط .. ولعب من دول ودول وكمان دول .. هات حوض للمية .. وحبة رملة من الغالين .. هات طوق شيك في أول حرف من اسمه (B) .. هات كل اللي ينفعه ويحتاجه .. وقلي أأكله ازاي .. ألاعبه ازاي .. أنيمه ازاي .. يتعامل ازاي .. سنه قد أيه .. يا ده صغير قوي (يادوب شهرين) .. والمفروض لو تعب أعمله أيه .. ولو زعل مني أصالحه أزاي .. ولو لعبت معاه هيعمل أيه .. وبللته بمية وحميته .. وأمتى أطعمه .. وأمتى أقص له ظافره .. وقلي كل حاجة .. أي حاجة .. أنا عني لبيـســو واللي من طرف بـيـســـو.

حطيته في بيته الجديد .. ده هيكون بيتك يا بيسو باشا .. وخليك في البلكونة .. تتفرج على السماء والشمس والقمر والناس .. تاكل بأيدي .. تشرب بأيدي .. تنام على أيدي .. أنت صاحبي وحبيبي ولو عايز ممكن تكون أخويا .. أنت الصغير المدلل .. والقط المنعم .. والصاحب اللي هشكيله .. واللي لما أفرح أجري وأحكيله .. واللي هيشاركني حياتي اللي جية .. واللي هياكل جنبي (في طبق تاني خالص) .. أنت .. أنت .. أنت .. بيـســـو حبيب قلبي الصغير.
وجرت على البيت .. قلبي بيطبل فرح واستقبال لبيسو .. ورجليا بترقص بخطواتها ومنسجمة مع بيسو .. وعنيا بتلمع ما أنا خلاص بقى عندي بيسو .. أفتحو الأبواب .. ورشوا الأرض رملة .. والكل يشوف والكل يهني .. بيــســـو جه يا ولاد .. بيسو بيسو يعيش بيسو.

.................... نستكمل حكاية أول يوم مع بيسو

لــون اللعب في القهواي

لعيب تعالى لاعبني .. وهلاعبك لاعبتك
صدقني مش غرور .. أنا هغلب حضرتك

هاتلنا طربيزة ودومنا .. واللعب على المشاريب
وهاتله هو حلبة .. وهاتلي شاي بحاليب
ونزل للقاعدين .. القهوة بن تقيل
واللي يخسر فينا .. يحاسبك على المشاريب

واللي واللي واللي

خد مني شيش وبيش .. وأي دش مفيش
لاعبني يالله لاعبني .. ولو حريف أغلبني

واللي واللي واللي

ما طياله قوم يا حسين .. هاتلنا شيشة بحجرين
اللعب يا عم مولع .. وأهي قفلت على اليكين

واللي واللي واللي

خلصت العشرة الأولى .. وغلبته يا ناس بسهوله
لاعب واحد زيك .. لسة يا عم في سنة أولى
حاسب يالله الزبون .. وأقفش منه المعلوم
كبيره يلعب سيجا .. مش قلت لك بردوم

لون يومين .. أعيشهم ليه ..؟!!

أنا أبقى أيه .. وأنت أيه .. وهو أيه ؟!
ما اللي فينا وشاف ما فينا يقول عليه
اللي تـــايــه مــــن متـاعــبـه حــس بيه
واللي حــاول خــش لاعــبــه وخد عنيه
أنــــا اللـــي مـــــابكــلـــش كــــويـــس
هـو اللي لف كويس وأنت سايس متسيس
مـــربـــوط في ســاقـيــة مغمي عنيه
مــتــــأخــزونـيــش ده كــلام نفـســيـن
شـــايــف طــشــاش .. منـخـيــر وعـنــين
والعــمــر فـــايـت وسـايبـلــي يــومــين
وبقول لنفسي ... أعيشـهم ليه ؟!

لحظات الزمن الجميل .. وألوانه

لا تفـــرّط فيمن يشــــتريك .. ولا تشتري من باعك

لا تندم على حب عشته حتى ولو صارت ذكرى تؤلمك

فاذا كانت الزهور قد جفت وضاع عبيرها

ولم يبق منهاغير الأشواك فلا تنسى أنها منحتك عطرا جميلا أسعدك

لا تكسر أبدا كل الجسور مع من تحب ...فربما شاءت الأقدار لكما يوما لقاء آخر

يعيد ما مضى ويصل ما أنقطع

فأذا كان العمر الجميل قد رحل .. فمن يدري ربما ينتظرك عمر أجمل

واذا قررت يوما أن تترك حبيبا فلا تترك له جرحا

فمن أعطانا قلبا لا يستحق أبدا منّا أن نغرس فيه سهما

أو نترك له لحظة ألم تشقيه

وما اجمل أن تبقى بيننا لحظات الزمن الجميل ...وألوانه

إلى مدونتي الصغيرة ذات الألوان الكثيرة
أهديك من وحي الأنغام ـ ـ ـ سطور فيها حبة كلام
علي أجد في كلماتي .. شفاء لبضع آهاتي

أ . ح . م

أجمل قصة حب عايشها معاك .. في هواك
أحلى كلام من القلب بيطلع وأنا وياك .. في لقاك
بسيب عيني تقول لعنيك .. كلام حاسه وشايفه أنا فيك
وأتوه لما تقول كلمة بحب أسمعها وأنا بين أيديك

قبل ما أقول الكلمة .. تقولها بصوتي .. يا حياتي
نفسي أعيش لك عمري وكل دقيقية في حياتي
واشتاق دائماً أقولك أحلى كلام .. يا سلام
لو يوصلك قبل ما أقوله بعيني قوام

إجابات مكتومة .. لون عادي مش هادي

عادي هعمل أيه .؟!
أهي ماشية الأيام بتعدي
وأنا عادي .. بأيدي ايه ..؟
راضي باللي فيه .!!
مهما كان مسدودة وتدي ..؟!
ومش فاهم بقى راضي ليه ..؟!

بصراحة .. قولي أزاي واشرحي براحة ..
جنبي ماشوفتيش أبداً راحة ..؟؟!!؟؟!!
أزاي جامدة ما بتحسيش ...؟!

مظلومة ..؟ ليه سايبة الإجابات مكتومة ..؟
قوليلي حجة تكون مفهومة .. يمكن أنسى وأقدر أعيش

وإن فضلتي ساكتة ومابتقوليش .. عادي .. هعمل أيه ؟؟!!
راضي باللي فيه .. ومش فاهم بقى راضي ليه ..؟!!

صباح حار ولون حار بالفول أبو زيت حار

اليوم عن غير عادتي .. صحوت بشكل منعم بالاستقرار الذهني إلى حد ما. ورغم قلة تعايشي في هذا الاستقرار لمدة طويلة في الأيام الماضية؛ إلا أن اليوم على غير العادة أجد ذهني في صفاء يكاد يساعدني على التعايش اليومي مع متطلبات الحياة.
فتوجهت إلى خزانة ملابسي وانتقيت بذلة قليلاً ما ألجأ إليها في ألوان ملابسي (بذلتي ذات اللون الكافيه الفاتح) وقد يكون ارتيادي لهذا البذلة بالأخص هو أحد انعكاسات صفاء الذهن واستقرار البال الذي أعيشه اليوم. وفي أقل من 30 دقيقة كنت على باب منزلنا الواسع لأخذ دوري في الاتسانسير (تلك الآلة التي تصعد بنا تارة وتهبط بنا أخرى وكثيرا ًما تكون معلقة) وتوجهت إلى المخرج النهائي بعمارتنا الطويلة ذات الأدوار الكثيرة.
وكعادته يقف عم (حسن) بعربته المشهورة وأدواته التي أصبحت جزءً من تراث حارتنا ليقدم لي أشهى وأجمل طبق فول (حار جداً) .. متنساش تزود الملح يا أبو علي ... وهتا كمان رغيفين من المنفوخين ومحروقين الأطراف طول ... أمال فين طبق السلطة (هي مش سلطة قوي .. هي مجرد خليط من ألوان حمراء وخضراء وصفراء ... ولكنها بعيدة كل البعد عن مفهوم السلطة المعتاد في المجتمعات الشبعانة) ... ها .. توكلينا على الله .. بسم الله الرحمن الرحيم ... وفي اقل من 20 دقيقة انتهى الطبق الحار أبو سلطة.
يااااه .. هل لهذه الدرجة نحن شعب أدمن الفول وأعتاد على (ضربه) أي أكله على الصبح. ليكون بمثابة الوقود الذي يدفع بنا كآلات إنسانية في طرقات حياتنا اليومية ... حقاً له السحر الفعال الذي لم يدركه أشهر دجالين القرن العشرون حتى الآن.
كدة يبقى محتاج أني (أضرب) حبة شاي وسجارة لتكتمل دائرة الأصطباحة (على رأي ناجي الحلاق) وأبدأ في تنغيم وتنشيد المانشطات الموجودة على الصحيفة اليومية كالعادة، فتوجهت إلى عم حسن (برده) لكن المرة دي بتاع الجرائد ... فالحسنوان متواجدان داخل نطاق حارتنا .. ولكن شتان بين طعام البطون وتنغيص الذهون (الفول والجرائد) خاصة في ظل التقلبات والتغيرات السياسية والاجتماعية التي نعيشها في الفترة الحالية.
أهلا عم حسن ... (أخبار الدنيا أيه النهاردة) .. والله يا ابني الأسود متاح على كل الصفحات ومنتشر وكأنه أصبح اللون السائد والوحيد في حياتنا اليومية .. بس متقلقش .. ده ميمنعش من حبة صور ملونة على كام صفحة كدة ... يالله أهي حاجة تهون السواد ده كله.
طبعاً عم حسن بتاع الجرايد ... رغم أنه مصدر ثقافة شارعنا اليومي .. إلا أنه ميعرفش يقرأ لا عربي ولا انجليزي ولا حتى صيني .. هو مش عارف غير العلامة بتاعة المأذنة والكام تمثال الفرعوني اللي مطبوعين على الجنيه.
ماشي يا عم حسن هات واحد سواد وظبطه، وفعلاً لاقيته بحركات الجينتل مان قاويلي الجريدة ولافيفها لافتين (خوفاً على أن تفقد شيئاً من سوادها) ومديهاني ... شكراً يا أبو علي يا مثقفنا سواد في سواد.
كدة يبقى مش فاضل إلى الاستقرار الجسدي على أحد كراسي المعلم (حسن أبو فتلة) ده اسم الشهرة لصاحب القهوة البلدي اللي موجودة بين ظقاق الحارة في أخر شارعنا ... أزيك يا أبو علي ... (مش عارف هي الحتة كلها علي ولا أيه) .. المهم .. هتشربنا الشاي التحفة بتاعك ؟! .. طبعاً ديه محتاجة كلام كبير .. أصل الشاي اللي حسن بيجيبه .. رغم أننا شاهرينه بحسن فتلة نسبة إلى أن الشاي اللي الناس واخدة عليه أضبحوا بيعبوه في بكيتات بفتلة .. حفاظاً على صحة المستهلك .. بس تقريباً أبو علي طمع في الفتلة وقال ممكن يعمل من كمية الفتلة اللي في الشاي صديري أو جلباب أو لو مكملش المليون ممكن يمشي حاله ويعمل شراب يغطي بيه رجله في عز البرد القارس.
المهم أنه بدأ في توزيع البكتات فعلاً بس بدون الفتلة .. أه ما هو حسن أبو فتلة ...!!.
وبدأت في القراءة والتصفح للمنشطات .. وأنا ارتشف الشاي شرفة شرفة .. حتى انتهى الكوب دون أن ينتهي السواد الي في الجريدة ... طيب يا أبو علي واحد كمالة بقى .. أصل أنت عارف الحياة بدون شاي متمشيش .. (تبقى أنت أكيد في مصر) ... ما شربتش من شايها .. المهم .. الحمد لله السواد بتاع الجريدة أصبح في الانكماش .. وأصبحت حالتي التي نزلت بها (صفاء الذهن واستقرار البال) في التحول هي الأخرى .. وأتى وقت الرجوع .. ليس عن السواد أو الشاي أو الفول ... الرجوع عن الحياة اليومية .. لأصعد ثانية إلى مستقر سريري وأترك السواد يحيط جفوني فأنام. ... حقيقي يوم حار جداً بالسلطة :)

لــون الغنى الحالي ... الله يرحمك يا خالي

حوار بين العبد والشيطان

شيطان وقال للعبد:
طول عمرك بتصلي .. وتسبح وتصوم
طول عمرك مشغولي .. بالحي القيوم
أدردح روح سنيما .. ألعب لك دور دومنا
الجارة اللي قصادك .. بتشاغلك عبرها
بتقلك وعنادك .. قربت تطيرها
عايزك تروح النت .. وأركب سوبرجت
عايزك متركزشي .. علشان متهيسشي

العبد قال للشيطان:
يا عدو الإنسان .. يا طريد الرحمن
من ضمن الأحاديث لنبينا المختار
كام حكمة يا إبليس للجارة وللجار

الشيطان قال للعبد:
لو تشرب يا منيل .. هتحس أنك عيل
بإزازة كونياك .. الهم هينساك

العبد قال للشيطان:
جي تضحك على دقني .. وأنا راجل أستاذ
أحسنلك تفارقني .. لأديك بالعجاز
مش عيب لما أطوح .. وأتمرمغ في الطينة
وأتساب في بوليلة .. من أهلي ومن جاري

عجبي عليه الإنسان .. مفوهش إلا لسان
عمال بيتكلم على الفاضي

لون .. حب الولد ابن البلد

لما رميت الشبك طلع الشبك خالي
وأيشيعمل اللي أنشبك في الحب يا خالي
هحكي الحكاية كلها هقولها والله الغني
الحب مهما هتعملوا لا فيه فقير ولا غني
كان في ولد ملوش بلد .. غير عين حبيته المخلصة
فلاح وغاوي يقول غناوي .. وبيلعب الخيل والعصا
قام الولد لم البلد وراح لأبوها في المسا
يطلب أيديها وينول مراده .. ويكتب كتابه تاني مسا
قاله أبوها مهرها غالي قوي تشوف معه الويل والأسى
قاله يا عمي متزودش غمي الحب أزاي يتنسى
خرج الولد برة البلد .. يشق في بلاد ربنا
يتعب ويشقى لكنه عارف أن المعين ده ربنا
رجع الولد تاني البلد ومعاه يا ناس من الخير مادد
الكل وسع للولد فرحان وراجع بالمادد
حبيبته فرحت بيه قوي .. ما الحب كان بينهم قوي
رجع الولد لنفس المكان .. لأخواته وأصحابه الجيران
وشاف كمان حبه اللي كان .. بدر وتمام زي القمر
طلب أيديها من زمان .. والمهر كان وله صدر
أبوها اقلوا لينا الشرف .. والحكم له فيها صدر
فرح الولد عمر بيوت .. وعاش في البلد منغير حاسود
والفرح بقى ملوش حدود .. والكل فرح في البلد
أدي الحكاية كلها قلتها والله الغني
الحب مهما هتعملوا
لا فيه فقير ..
ولا غني

بلون السنة الجديدة .. وهأختار ألواناتي

HappyNewYear -(( 2OO8))